ភ្នំពេញ៖ អាជ្ញាធរមីនកម្ពុជា បានចុះអនុស្សារណៈយោគយល់គ្នាជាមួយធនាគារ ABA ដែលបានចូលរួមវិភាគទាននូវថវិកាចំនួន ២០ម៉ឺនដុល្លារអាមេរិកសម្រាប់គាំទ្រគម្រោងសម្តេចតេជោសម្រាប់សកម្មភាពមីន «ផ្តល់ដីសុវត្ថិភាព បង្កើតស្នាមញញឹម»។ ការចុះ MOU ធ្វើឡើងនៅថ្ងៃពុធ ទី១៣ ខែកក្កដានេះ។

អនុប្រធានទីមួយអាជ្ញាធរមីនលោកទេសរដ្ឋមន្ត្រី លី ធុជ បានថ្លែងអំណរគុណចំពោះការចូលរួមរបស់ធានាគារ ដោយថាការចូលរួមនេះបានផ្តល់ដីមានសុវត្ថិភាព ជួយសង្រ្គោះអាយុជីវិតមនុស្ស និងផ្តល់ស្នាមញញឹមដល់ប្រជាពលរដ្ឋកំពុងរស់នៅតំបន់រងផលប៉ះពាល់ដោយសារគ្រាប់មីន និងយុទ្ធភ័ណ្ឌមិនទាន់ផ្ទុះ។

តំណាងធនាគារ ABA លោក Askhat Azhikhanov បានកោតសរសើចំពោះសកម្មភាពរបស់អាជ្ញារធរមីនក្នុងការដោះស្រាយបញ្ហាមីននៅកម្ពុជា ហើយថា អាជ្ញាធរមីននឹងមិននៅម្នាក់ឯងទៀតទេគឺបច្ចុប្បន្នមានការចូលរួមពីវិស័យឯកជន និង ប្រជាពលរដ្ឋកម្ពុជាទូទាំងប្រទេស។

លោក Askhat Azhikhanov បន្តទៀតថា ធនាគារ ABA នឹងបន្តចូលរួមវិភាគទាននេះជាមួយអាជ្ញាធរមីនក្នុងការដោះស្រាយបញ្ហាគ្រាប់មីនរហូតដល់ឆ្នាំ២០២៥៕